Obxectivos e contidos do obradoiro:

Laboratorio de prácticas performativas e investigación teórica arredor da performance art feminista, a danza, as artes visuais e a linguaxe en relación cos estudos de xénero.

Neste laboratorio desenvolverase unha investigación práctica arredor do corpo e a linguaxe como ferramentas performativas. Dende unha perspectiva crítica sobre a súa semántica social dende un ángulo feminista, experimentarase co corpo a través do movemento e analizaranse conceptos e textos chave nos estudos da performance e de xénero.

Obxectivo do obradoiro:

Introdución aos estudos de performance e de xénero, análise do repertorio de performance feminista do século XX e XXI dende unha perspectiva decolonial, prácticas, debates e improvisacións.

Contidos do obradoiro:

· Historia da performance feminista no século XX e XXI

· O corpo-arquivo

· A sonomateca, as artes performativas e o movemento cuir

· Análise crítica do discurso feminista na arte

· A Phoné e o Logos do corpo feminino e as disidencias sexo-xénero no espazo público

· Hexis e Habitus do corpo

· Silvia Federici e arte, corpo e colonización

· O intimo e o político na performance art feminista

· A reprodución social e os coidados feministas na arte

· O tratamento do espazo co corpo e o tratamento do corpo co espazo

· O corpo social feminista, movementos sociais e artivismo

· Prácticas e improvisacións de laboratorio

· Lectura de textos

· Análise de pezas

Currículo da educadora:

Helena Salgueiro é directora escénica, poeta e performer. Formada en estadías co Instituto Grotowksi e co Odin Teatret, o Traverse Theatre, a Universidade de Edimburo e a Universidade de Santiago de Compostela. Os seus traballos escénicos amosáronse internacionalmente en festivais e espazos como o Centro Nacional de Danza Dance Base de Escocia (“Nortear”), o Festival Contradança de Portugal (“Ferro, Federici”) e coproducidos polo Centro Dramático Galego (“Come and Go”). Autora dos poemarios Intermitencia da cidade (2013), As Flores (2016), SORA (2025), Amor Palimpsesta (2026) e da obra de teatro Todas as Illas son unha illa (2021). Dirixe a compañía Columna Balteira.