Obradoiro de Escrita creativa
Obradoiro de 30 horas
Pódese aprender a escribir? Ou o talento literario é unha calidade innata sobre a que o traballo e o estudo ten unha influencia menor? Esa disxuntiva marcou as diferentes aproximacións á escritura creativa desde que alguén se expuxo por primeira vez ensinar a outros a escribir.
Neste taller de Escritura Creativa 1 veremos as diferentes técnicas e recursos que poden converter unha faísca inicial de inspiración nun manuscrito terminado.
Abordaranse os principais retos aos que se enfronta un autor novel e veremos como impedir que se convertan en obstáculos para conseguir o obxectivo final, ese co que tantos soñamos ao longo da historia: escribir un libro.
Veremos os diferentes xéneros literarios, tanto de ficción como de non ficción, pero centrarémonos especialmente na narrativa e as súas técnicas.
Obxectivos:
- Dotar ao alumnado dos coñecementos suficientes sobre escritura creativa para que
poidan abordar a creación dun manuscrito.
- Expor as diferentes fases das que se compón a escritura dun libro.
- Mostrar os puntos principais da planificación dunha novela.
- Explicar os elementos esenciais que compoñen a escritura dun manuscrito: trama,
personaxes, ambientación, atmosfera, punto de vista, escenario, etc.
- Abordar as cuestións relativas ao estilo e o ton de escritura dunha novela.
- Especificar as fases de corrección dunha novela (mesa, estilo, ortotipográfica) e como
pode o autor abordalas.
- Tratar as cuestións máis descoñecidas do sector editorial para que o alumno poida
achegarse a el cun coñecemento superior ao habitual.
- Axudar a crear unha mentalidade positiva para abordar o traballo de escribir e os retos
que leva asociados
__
Educadora: Rocío Otero
Abril Camino (pseudónimo) é licenciada en Filoloxía Hispánica (UDC) e Filoloxía Inglesa (UNED) e Máster en Edición (UOC). A súa traxectoria profesional estivo sempre vinculada aos libros e a escritura, traballando en diferentes eidos: a ensinanza de linguas e literaturas, a corrección de textos, a escritura de guións, a tradución ou a prensa escrita. No ano 2015, escribiu a súa primeira novela (Pecado, penitencia y expiación) e decidiu probar sorte na autopublicación, unha opción da que se comezaba a falar naqueles tempos. O éxito de ventas e crítica deu un xiro á súa carreira e, dende o ano 2018, dedícase en exclusiva á escritura. Despois de combinar durante varios anos a autopublicación coa edición tradicional en selos como Ediciones Urano ou Penguin Random House, dende o ano 2021 é autora en exclusiva da Editorial Planeta. É unha faciana habitual nas feiras do libro e outros eventos literarios do panorama estatal, ademais de impartir cursos e conferencias en diferentes centros educativos e asociacións literarias.
O alumnado da UDC terá dereito ao recoñecemento de créditos, segundo establece a normativa de aplicación (Resolución reitoral do 17/02/2022)