Obradoiro de proposta libre

Xestionar un festival nunha comunidade local: da idea á práctica

Obradoiro de 10 horas

Obradoiro de formación en xestión cultural para xente profana (e non tan profana) que teña unha idea de evento ou festival e lle gustase poñer en práctica, preferentemente desde un traballo que integre a comunidade local onde se vai implantar o devandito acontecemento. 

Teño unha idea para facer un festival, pero que fago con ela? Como empezo? Como podo desenvolvela, financiala, comunicala? E, sobre todo, como podo intentar non fracasar, ou non fracasar no básico? 

Tratarase dun obradoiro práctico impartido por unha persoa con experiencia, que ten o nariz chato dos portazos que recibiu nel e a pel curtida do traballo sacrificado da xestión cultural á intemperie. 

Docente: Alfonso García Pérez

CV DE ALFONSO PATO

Xestor cultural e xornalista. Fundador e director do Festival de Cans desde 2004.

Licenciado en Filoloxía Hispánica pola USC. Ten unha ampla traxectoria como xornalista e director de programas culturais en televisión, amais de na xestión de proxectos culturais. Traballou como xornalista cultural na TVG, TVE e El País, e na actualidade en elDiario.es. Así mesmo, goza dunha ampla traxectoria no ámbito da creación de denominacións (naming), en que concibiu numerosos nomes de marca para festivais e empresas culturais.

Impartiu coloquios sobre festivais e xestión cultural comunitaria en universidades europeas como a Universidade de París 8, a Universidade de Deusto (Euskadi), a Universidade Católica Portuguesa do Porto (Portugal), a Universidade de Santiago de Compostela (USC) ou a Saint Louis University (campus de Madrid), alén de en encontros organizados polo Ministerio de Cultura, a Xunta de Estremadura ou o Principado de Asturias.

Creador de proxectos arredor da música como o Festival Terraceo en Vigo (2019-ata a actualidade) ou Espazo Fest en Nigrán (2019-2023). Traballou na organización e comunicación de institucións como o Auditorio Mar de Vigo, e eventos como Maré, Womex Coruña (World Music Expo) ou Música na Rúa en Escairón (Lugo). Membro fundador da Coordinadora de Festivais de Cinema de Galicia (Proxecta), en que forma parte da Xunta Directiva.