YouTube é xa moito máis que unha plataforma para subir vídeo, é todo un medio de comunicación no que cada vez máis persoas, especialmente a mocidade, atopan moitas das súas referencias informativas e aspiracionais. Pero, que hai de mito e realidade detrás de figuras profesionais como youtubers ou influencers? E, sobre todo, como podemos empregar nós unha canle de YouTube?
Dirixido a un público xeral, pero especialmente a quen teña intereses creativos e culturais por utilizar os contidos audiovisuais e as posibilidades de YouTube como ferramentas para a divulgación, a sensibilización, o activismo e/ou a educación, ben en contextos formais ou informais.
O curso, de 15 horas de duración, combinará pequenas pílulas de contido en liña, incluídos exercicios prácticos e interactivos, cunha parte de traballo práctico titorizado, incluídas sesións grupais en contornas virtuais.
Obxectivos:
Achegarse ás cuestións técnicas básicas para xerar contidos e optimizar unha canle de YouTube.
Coñecer as claves vinculadas á visibilidade, posicionamento e retorno nesta contorna.
Practicar coas posibilidades da ferramenta para xerar contidos para a divulgación, a sensibilización ou a acción educativa, arredor da temática escollida polas persoas participantes e axeitada aos seus intereses.
Metodoloxía e contidos:
O curso combinará pequenas pílulas de contido en liña, incluídos exercicios prácticos e interactivos, cunha parte de traballo práctico titorizado, incluídas sesións grupais en contornas virtuais.
Como funciona YouTube? Introdución técnica á creación dunha canle en YouTube.
Que quero contar e como? Definición da estratexia de contido.
Como podo mellorar os vídeos que gravo? Consellos básicos para gravación e edición con dispositivos móbiles. Posibilidades técnicas internas de YouTube para a edición audiovisual.
Que música e recursos podo utilizar nos meus vídeos? Ferramentas gratuítas para que YouTube non elimine o teu contido.
Como fago para que alguén me vexa? Optimización dunha canle e estratexias para atraer públicos.
Como creo a miña propia comunidade? Expansión da canle de YouTube a outras redes sociais para afianzar públicos.
E cando me fago rico? Realidades e mitos sobre monetización e visibilidade, dende a perspectiva dos contidos galegos
Esta formación desenvolverase en liña na súa totalidade, xa que logo, non require a participación do alumnado nun horario específico na meirande parte do curso, xa que os contidos e as actividades estarán dispoñibles en todo momento.
Só haberá tres sesións que si requirirán a participación síncrona do alumnado (nun horario concreto), que serán as seguintes videoconferencias grupais (de 1h cada unha):
Charla inicial de benvida e de coñecemento do grupo: martes 27 de outubro
Sesión intermedia: luns 9 de novembro
Sesión final de posta en común de proxectos e despedida: martes 17 de novembro
As tres ás 18:00. E entre sesión e sesión iríanse compartindo contidos audiovisuais e dixitais.
Á titorización e resolución de dúbidas, o equipo de titorización responderá a estas mensaxes nun prazo máximo de 48 horas, ben sexa a través dos foros se a consulta é aberta ou de mensaxes directos, se a consulta é individual e/ou privada.
O curso será accesible a través de calquera navegador web. Recoméndase acceder a través de computadores de sobremesa, aínda que tamén sería accesible con tabletas. Non se precisa a instalación de ningún programa informático de pagamento.
Docentes: Marga Rodríguez e Román Castaño.